У судзе Бабруйскага раёна і Бабруйска вынесены прысуд студэнту-трэццякурсніку БНТУ Мікіту Маляру, абвінавачананаму ў апаганьванні дзяржаўных сімвалаў (арт. 370 Крымінальнага кодэкса), паведамляе праваабарончы цэнтр «Вясна».
Справу разглядаў суддзя Антон Дудаль.
Па матэрыялах абвінавачання, 20-гадовы Мікіта Маляр разам з сябрам восеньскім вечарам прагульваўся па Бабруйску і каля адной з крам наўмысна падскочыўшы, рукой схапіўся за палотнішча сцяга Беларусі, усталяванага на дрэўку ў металічным кранштэйне, з сілай пацягнуў яго ўніз. У выніку чаго сцяг разам з фрагментам дзяржала адламаўся ад месца мацавання і ўпаў на тратуарную плітку. Затым, утрымліваючы яго ў руках за дрэўка, абвінавачаны прабег не менш за 20 метраў, размахваючы ім. На другі дзень палотнішча выкінулі на вуліцу.
Дапытаны ў судовым пасяджэнні абвінавачаны сваю віну па прад’яўленым абвінавачванні прызнаў часткова, паведаміў суду, што не меў намеру апаганіць дзяржаўны сімвал.
Аднак суд, які адбыўся 25 лістапада, прызнаў Маляра вінаватым у здзеку над сцягам, і прызначыў яму пакаранне ў выглядзе абмежавання волі з накіраваннем у папраўчую ўстанову адкрытага тыпу тэрмінам на два гады.
Мера стрымання да ўступлення прысуду ў законную сілу адмененая, яго вызвалілі з-пад варты ў зале суда.
Пазней стала вядома, што Нікіта Маляр накіраваны для адбыцця пакарання ў ПУАТ № 6.
Адрас для лістоў: ПУАТ-6, 225 886, Брэсцкая вобл., Кобрынскі р-н, в. Лушчыкі, вул. Лясная, д. 14.